ചിത്രകാരന്‍

ജീവിതത്തിന്‍റെ കുളിരകറ്റാന്‍
നനഞ്ഞ തൂവലുകള്‍
മാറോടടുക്കുന്ന
യുക്തി മറന്ന ചിത്രകാരന്‍
വര്‍ണ്ണങ്ങളില്‍
നരയും വിറയലും
തീര്‍ത്ത ചിത്രങ്ങള്‍
മാര്‍ക്കറ്റിലെ
ട്രെന്‍ഡ് അറിഞ്ഞില്ല
ജീവന്‍റെ പുസ്തകത്തില്‍
ആയുസിന്‍റെ
നിറങ്ങള്‍ചാലിച്ച്
ഇനിയുമെത്ര നാള്‍
വരച്ചു തീര്‍ക്കണം

ചരിത്രം

ഞെട്ടറ്റു വീഴുന്ന
ഇലകള്‍ക്കും
ചിലത് പറയാനുണ്ടാകും
പക്ഷെ
ആര് ശ്രദ്ധിക്കാന്‍
ചവിട്ടി മെതിക്കും.
ഒടുവില്‍
മണ്ണിനടിയില്‍.
ഒരിക്കല്‍
ചരിത്രകാരന്മാര്‍
മണ്ണ് ചികഞ്ഞ്
ചരിത്രം പറയുമ്പോള്‍
നാം
തലകുലുക്കും
സമ്മതിക്കും.

ദൈവദൂതന്‍

വഴിയരികില്‍
ആക്സിടന്റില്‍പ്പെട്ട എന്നെ
കൈ പിടിച്ചുയര്‍ത്തിയ വൃദ്ധന്റെ മുഖം
ദൈവത്തെപോലെ ശോഭിചിരുന്നില്ല
മാത്രമല്ല
അയാളുടെ വേഷം
പഴകിയ ഒരു പാന്റ്സും ഷര്‍ട്ടും
മീതെ ഒരു കറുത്ത കോട്ടുമായിരുന്നു.
(ദൈവദൂതന്മാര്‍ ശുഭ്ര വസ്ത്രധാരികള്‍ ആണെന്ന്
പള്ളിയില്‍ അച്ചന്‍ പ്രസംഗിക്കുന്നത് ഞാന്‍ മറന്നിട്ടില്ല)
എന്നാലും
കൈപിടിച്ചു ഉയര്‍ത്തുമ്പോള്‍ ഒരു സ്നേഹ സ്പര്‍ശം..
കുപ്പിയിലിരുന്ന വെള്ളം കൊണ്ടു
കാലിലെ രക്തം കഴുകുമ്പോള്‍
ഒരു ആശ്വാസം ......
തിരക്കുള്ള വഴിയാണ്... ഒത്തിരി വണ്ടികള്‍
സൂക്ഷിച്ചു ബൈക്ക് ഓടിക്കണമെന്ന് പറയുമ്പോള്‍
ഒരു കരുതലിന്റെ സ്വരം ....
ഹേയ്.. ഇല്ല..
സാത്താനെ നീയെന്നെ കബളിപ്പിക്കാന്‍ നോക്കണ്ട
ദൈവദൂതന്മാരെ എനിക്കറിയാം
ദൈവമേ നീ എന്നെ കാത്തുകൊള്ളണമേ.